Qazaqstan halqy Assambleıasynyń qoldaýymen «Qoǵamdyq kelisim» RMM uıymdastyrǵan alqaly basqosýǵa eteomádenı birlestikterdiń ókilderi, etnoaǵartý keshenderiniń ádiskerleri, oqytýshylary, til salasynyń mamandary men janashyrlary qatysty.
Semınar-trenıngti «Qoǵamdyq kelisim» RMM qyzmetiniń jetekshisi Janna Shaımuhanbetova kirispe sózben ashyp, tilderdi qysqa merzimde oqytýdyń ońtaıly ádis-tásilderin aıqyndaý, Qazaqstan halqy birliginiń mańyzdy faktory retinde memlekettik tildiń rólin arttyrý, qazaqstandyq biregeılikti qalyptastyrý joldaryna toqtaldy. Ol sonymen qatar latyn álipbıine aýysý máselesi jalpyhalyqtyq talqylaýlarǵa ulasyp, qundy oı-pikirler aıtylyp jatqanyn, ýaqyt talabymen úndes naqty sheshim qabyldaý asa mańyzdy ekenin atap ótti.
Tilderdi damytý basqarmasynyń basshysy Kemel Ospanov rýhanı qundylyqtar tilimizdi jańǵyrtý úderisinde sheshýshi býyn sanalatynyn, al latyn álipbıine aýysý el, jastar bolashaǵy úshin jasalatyn qundy qadamdar bolyp tabylatynyn jetkizdi. № 17 ulttyq órkendeý orta mektep-kesheniniń dırektory Lázzat Jalmuqanova jınaqtalǵan is-tájirıbeler jaıly áńgimelese, «Myń bala» respýblıkalyq mádenı-aǵartýshylyq jobasynyń jeńimpazy Galına Jýkova qazaq tilin meńgerýdi, úırenýdi balabaqsha men mektepten bastaýdyń tıimdiligine jınalǵandardyń nazaryn aýdardy. Jazýshy Qanat Tasybekov jaǵdaıattyq qazaq tili ádistemesiniń negizinde oqytý týraly oı bólisti.
Trenıngte Y. Altynsarın atyndaǵy Ulttyq bilim akademııasy Orta bilim ınstıtýtynyń dırektory Aldash Raqymjanov «Memlekettik tildi oqytýdyń tıimdi ádis-tásilderi», Ulttyq tilderdi oqytý ortalyǵynyń jetekshisi Aıjan Suńǵatova «Qazaq tilin shet tili nemes ekinshi til retinde oqytý», YOUTYBE beıneportalyndaǵy «Kazahskıı ıazyk za 2 nedelı» beınesabaqtarynyń avtory Dosjan Nurseıitov «Qazaq tilin aqparattyq kommýnıkasııalyq tehnologııalar múmmkindigin paıdalana otyryp jedeldete oqytý» taqyryptary aıasynda óz oılaryn ortaǵa saldy.
«Qoǵamdyq kelisim» RMM-niń bas sarapshysy Ádilet Dúısenbıev «Elbasymyz «»Bolashaqqa baǵdar: rýhanı jańǵyrý» maqalasynda taıaý jyldardaǵy mindetterdiń biri retinde isqaǵazdaryn, merzimdi baspasózdi, oqýlyqtardy latyn álipbıimen basyp shyǵarý qajettigin alǵa tartty. Qazirdiń ózinde alǵy sharttar bastalyp ketkenin kórip otyrmyz.
Úkimetke qazaq tilin latyn álipbıine kóshirýdiń naqty kestesin jasaý tapsyryldy. Jyl aıaǵyna deıin qazaq álipbıiniń jańa grafıkadaǵy biryńǵaı standartty nusqasy qabyldanaryna senimdimin. Bul oraıda, ǵalymdarǵa, til mamandaryna, barsha qoǵam ókilderine úlken jaýapkershilik júktelip otyr», dedi BAQ ókilderine bergen suhbatynda.
О́mir Esqalı,
«Egemen Qazaqstan»
Soltústik Qazaqstan oblysy
